Откако поранешниот играч на Реал Мадрид и репрезентативец на Велс, Гарет Бејл, одлучи да се пензионира, велшкиот селектор Роберт Пејџ објави дека Бејл ќе добие улога во националниот тим.
Сѐ уште не е дефинитивно прецизирано кои ќе бидат неговите обврски, но се очекува тој да му помага на тренерот во водењето на репрезентацијата.
„Кога имате некој со големина на Гарет Бејл, со сето она што го направи за Велс и влијанието што може да го има дури и ако е само околу играчите во соблекувалната, тоа е нешто што треба да го искористам“, рече Пејџ, пренесув „Скајспорт, и додаде дека Бејл е заинтересиран за новата улога во репрезентацијата на Велс.
„За која улога? Ќе разговараме за неколку недели. Тоа што тој го направи е феноменално, не само од фудбалска гледна точка, туку и за земјата бидејќи го врати Велс на светската фудбалска карта“.
Бејл за репрезентацијата одигра 111 натпревари и постигна 41 гол, а последниот натпревар го имаше на Светското првенство во Катар против селекцијата на САД. Тој е убедливо нјадобар стрелец во историјата на Велс, додека иако во моментов е лидер и по број на настапи, има само два односно три повеќе од дефанзивецот Крис Гантер (109) и голманот Вејн Хенеси (108) кои годинава сигурно ќе го престигнат на оваа вечна листа.
Гарет Бејл остави огромна трага во велшкиот фудбал бидејќи ја предводеше репрезентцаијата до историски пласмани на ЕУРО 2016 и ЕУРО 2020, како и на Мундијалот 2022. Претходно Велс никогаш немаше играно на Европско првенство, додека на Мундијал се имаше појавено само еднаш и тоа во далечната 1958 во Шведска. На ЕУРО 2016 Бејл го предводеше Велс дури до полуфиналето, што е најголем успех во историјата на велшкиот фудбал, кој тешко дека некогаш ќе биде достигнат.
