Откако шведската активистика зборуваше дека е загрижена за шумата во Амазонија, следеше остар коментар од бразилскиот претседател Жаир Болсонаро кој ја нарече мало детиште.
Шестнаесетгодишната Тунберг во својот говор го спомена и убивањето на домородците во амазонската прашума.
„Грета рече дека домородците умреа бранејќи го Амазон. Просто неверојатно е како ова детиште зазема дел од медиумскиот простор“, изјави Болсонаро.
По неговите коментари, Тунберг во описот на својот Twitter профил го додаде изразот pirralha (детиште).
Шведската тинејџерка ја коментираше смртта на домородците за време на Меѓународната конференција на ОН за климатските промени на која бразилската политика за заштита на животната средина беше предмет на критики.
„Населението е убивано затоа што се обидува да ја заштити шумата од илегална сеча“, рече Грета. „Срамота е светот да молчи за тоа“.