Changan претставува верзија на пикап моделот Hunter со технологија за проширен опсег (EREV). Во зависност од верзијата, овој пикап камион може да се придвижува од еден или два електромотора со помош на 2,0-литарски турбо бензински мотор, кој работи исклучиво како генератор на енергија.
Верзијата со еден електричен мотор, поставен на задната оска, генерира 177 КС. Помоќната верзија со погон на сите тркала има два електрични мотори, при што оној на предната оска произведува дополнителни 95 КС. Во двата случаја, 2.0-литарскиот турбо бензински мотор, кој развива 190 КС, делува исклучиво како генератор на електрична енергија, а оваа технологија во Кина станува сѐ поинтересна за производителите.
Двата модела имаат иста литиум-железо-фосфатна батерија од 31,18 кВтч, која во електричен режим обезбедува опсег од 180 км според многу дарежливиот кинески CLTC циклус. Но, суштинската моќ на овој концепт е 2.0-литарскиот бензински мотор.
Произведувајќи електрична енергија за електричните мотори, која се складира во батеријата преку генераторот, бензинскиот мотор му обезбедува на овој атрактивен пикап автономија од дури 1.031 км. Она што е пофасцинантно и малку чудно, производителот на автомобили тврди дека без разлика на верзијата со погон на задните тркала или на сите четири, автономијата е потполно иста.
Возилото е долго 5.380 мм и има меѓуоскино растојание од 3.180 мм. Клиентите можат да изберат продолжена варијанта со двојна кабина, која носи подолг товарен простор, но и поголема вкупна должина на возилото од 5.630 мм и подолго меѓуоскино растојание од дури 3.430 мм. Од друга страна, Changan Hunter сè уште има прилично скромна носивост од само 495 килограми.
Што се однесува до цените во Кина, кои треба да се земат со резерва во остатокот од светот, почетниот модел Hunter Warrior Edition Deluxe со еден мотор и стандарден товарен простор започнува од 139.900 јуани, што е приближно 19.700 долари. Верзијата со погон на сите тркала чини 149.900 јуани (21.090 долари). Подолгите варијанти се само 1.000 јуани (142 долари) поскапи, јавуваат кинеските медиуми.
За споредба, еден од најприфатливите пикап модели во САД е Ford Maverick XL, чија цена започнува од 24.995 долари. Ако Changan реши да го извезе својот пикап во Америка, дефинитивно таму ќе стане најприфатливиот, освен ако увозните даноци не го променат тоа, што е многу извесно.
