Македонските ракометари нема да играат на Олимписките игри во Рио де Жанеиро, откако во клучниот натпревар загубија од Тунис 26:32 (10:17). Тунис со двете победи обезбеди настап на ОИ, додека Македонија со она што го одигра во првите две кола на овој турнир не заслужи да оди во Рио.
Стартот на мечот го најави неславниот крај на Македонија на турнирот во Гдањск, испуштање на историска шанса за пласман на најголемата спортска смотра, каде што нашата држава никогаш не настапила во некои од колективните спортови.
Катастрофално лоша беше играта на ракометарите во текот на целиот натпревар. Одбраната не функционираше, голманите немаа свој ден, а во нападот се се сведуваше на индивидуални акции.
Таквиот пристап им овозможи на борбените Тунижани да го контролира натпреварот во текот на сите 60 минути.
Тунис отвори со три гола во првите три минути, а дебаклот на нашиот тим беше најавен во осмата минута кога резултатот беше 1:8.
На полувреме Тунис имаше огромни седум голови предност 10:17, Македонија се обиде во вториот дел, противникот оставаше можности за евентуален пресврт, но секогаш кога таква шанса ќе се укажеше, наместо организиран напад „црвено жолтите“ се обидуваа со индивидуални акции, кои во најголем дел завршуваа неуспешно.
„Немам што да кажам. Катастрофа. Не е време да се даваат некои одговори. Не треба да се биде паметен да се види што се случуваше. Едноставно ги загубивме главите, лошо почнавме, од пусто брзање правевме грешки, а тие сето тоа го контролираа. Свесни бевме што ни значи ова, за нас, за цела генерација, за цела Македонија. Не знам во кој правец да размислувам во овој момент. Знам дека имаме добра репрезентација. Треба сега да се оладат главите, па да видиме што понатаму“, рече веднаш по мечот за МРТ, капитенот Кире Лазаров, кој со осум голови беше најефикасниот во македонската репрезентација.
Тунис го предводеа голманот Магаиз со 13 одбрани, односно Бугами со седум и Саед со шест голови.
