Мелани Марден, која се појави во спотот на раперот Ти Ај како двојничка на Меланија Трамп, вели дека добива смртни закани поради контроверзниот спот. Во спотот таа е прикажана како танцува гола во претседателската канцеларија во Белата куќа.
Канадската актерка Мелани Марден беше најмена да глуми во спотот како двојничка на првата дама на САД, Меланија Трамп, но ситуацијата се вжешти откако излезе спотот.
„Бев ангажирана како актерка а не како стриптизерка. Сакав да бидам храбра и првпат во животот прифатив улога која од мене бара да се соблечам. Не треба да се срамиме од телото. Во момент кога жените конечно почнуваат да зборуваат за тоа дека се жртви, се почувствував доволно силно за да се појавам во улогата на прва дама на САД“, рече Марден.
Таа вели дека на почетокот, пред да излезе спотот, тоа била одлука со која се гордеела. Меѓутоа, по излегувањето на спотот почнала да добива закани кои смета дека го ставаат нејзиниот живот во опасност.
„Некој напиша дека ќе ме удри со автомобил, некој дека ќе ме нападне со бејзбол палка, а многумина ми се заканија дека ќе ме силуваат и ќе ме убијат. Тие коментари немаат врска со мене и на сите нив им испраќам многу љубов. Опуштете се, јас сум само актерка во спот“, порача Марден.
Актерката напомена дека нејзиното појавување во спотот на Ти Ај било професионален ангажман кој нема допирна точка со политика, Доналд и Меланија Трамп, ниту САД.
