Исланд направи сензација на Европското првенство, ја совлада Англија со 2-1 и избори пласман во четвртфиналето, каде ќе игра против Франција.
Исланд на стадионот во Ница, уште еднаш покажа дека не случајно во квалификациите заврши пред Чешка, Турција и Холандија и дека недостигот на индивидуален квалитет против реномирани противници, може да го надомести со тактичка дисциплина и фанатична борбеност.
Тимскиот дух на Исланѓаните на „своја кожа“ го почувствуваа фаворизираните Англичани, во чии редови настапуваат неколку ѕвезди на светскиот фудбал, а еден Рахим Стерлинг на фудбалскиот пазар вреди два и пол пати повеќе од целата исландска селекција.
Во Ница искусниот Ларс Лагербек, на својот врсник Рој Хоџсон му одржа тактичка лекција и само го потврди она што го констатира пред мечот, дека никогаш не загубил од Англија.
Не само тактичката поставеност на Исланд, туку и самиот Хоџсон придонесе за дебаклот на англиската репрезентација, која со играта не импресионираше ниту во групната фаза.
Хоџсон слепо им веруваше на Стерлинг и Кејн, кои одиграа катастрофално на овој шампионат, а доверба имаше и во Вилшир, кој сезонава одигра нецели 200 минути во Премиер лигата.
Неразбирливо е англискиот селектор да не му верува на играчот на сезоната во Премиер лигата, Варди, на тинејџерот Рашфорд, а да биде убеден дека Руни може да ја организира играта.
А почетокот на натпреварот не навестуваше англиски дебакл, Холдорсон во четвртата минута непотребно го сруши Стерлинг, Скомина покажа пенал за Англија, а Руни беше сигурен реализатор.
Но во следниот напад Исланѓаните ја изиграа англиската одбрана, а топката од аут заврши пред голот на Харт и Рајнар Сигурдсон ја смести во мрежата за 1-1.
Исланд направи пресврт во 19.минута, откако Англичаните им дозволија на противниците да комбинираат на 16 метри од нивниот гол, топката стигна до Сигтерсон, кој шутираше, а лошата реакција на Харт доведе до 2-1 за Исланд.
До крајот на мечот Исланд најчесто се бранеше, но и имаше две големи шанси порано да го реши победникот. Англичаните напаѓаа, Хоџсон направи неколку промени кон крајот на дуелот, но тоа не им помогна да стигнат до израмнување и евентуални продолженија.