Атлетико Мадрид, со пресврт, го победи Еибар (3-1), а натпреварот ќе го памети Ферандо Торес, кој го постигна неговиот 100-ти гол во дресот на Атлетико.
Атлетико на овој меч настапи во „шарен“ состав, кој веројатно никогаш повеќе нема да игра заедно. Поради повреди и суспензии, Диего Симеоне, имаше само еден играч од стандардната четворка во одбраната. Поради тоа како централен дефанзивец заедно со Хименез играше Саул Нигез, кој во 48. минута, направи грешка и му овозможи на Кека да му донесе водство на Еибар на „Винсенте Калдерон“.
Потоа Атлетико направи пресврт во интервал од шест минути, Коке два пати одлично изведе корнер, а голови постигнаа Хименез и Саул Нигез. Торес во 92. минута ја потврди победата на Атлетико.
Фернандо Торес го постигна својот втор гол сезонава, а прв уште од септември кога беше стрелец токму против Еибар.
Торес беше член на Атлетико од 2001 до 2007 година, потоа играше во Ливерпул, Челзи и Милан, а на „Винсенте Калдерон„ се врати пред една година.
