На свечена церемонија што се одржа синоќа во Мадрид, беа прогласени најдобрите фудбалери во измината сезона во шпанскиот фудбал. Лауреат за минатата сезона е напаѓачот на Атлетико, Антоан Гризман.
La Liga на церемонијата подели награди во девет категории, а најголем дел од нив заминаа на „Винсенте Калдерон“, домот на фудбалерите на Атлетико Мадрид.
Лауреат за изминатата сезона е Антоан Гризман, кој доби две награди: навивачите го избраа за најпопуларен играч, а францускиот репрезентативец ја доби и најпрестижната награда на церемонијата - фудбалер на годината.
Награди добија и соиграчите на Гризман, Јан Облак за најдобар голман и Диего Годин за најдобар дефанзивец. Награда освои и Диего Симеоне од Атлетико за тренер на годината.
Најдобар играч од средниот ред е Лука Модриќ, неговиот соиграч Марко Асенсио кој минатата сезона настапуваше во Еспањол ја доби наградата за најдобар млад фудбалер.
Две награди освоија фудбалерите на Барселона, Лео Меси е најдобар напаѓач, а Луис Суарез најдобар странски фудбалер во La Liga.