Аматерите од фудбалскиот клуб Сатон и нивниот резервен голман Вејн Шо се вистински хит во светските медиуми. Најпрвин поради пласманот во 5.коло во ФА купот и мечот со Арсенал, а потоа и поради голманот Шо кој во текот на мечот јадеше на клупата каде што седат резервите.
Арсенал го победи Сатон со 2:0 и во четвртфиналето ќе игра против третолигашот Линколн, но гостувањето на славниот тим во сенка го фрли 46-годишниот голман Вејн Шо.
Откако неговиот тренер ги изврши трите замени, тој се упати кон клупскиот ресторан и на клупата за резерви се врати со пита со месо и компир.
Подоцна се испостави дека Шо тоа го направил со намера, бидејќи обложувалницата „Сан бетс“, понудила коефициент 8/1 дека голманот ќе конзумира храна за време на натпреварот.
Обложувалницата со овој потег си направи добар маркетинг, но Шо може да се најде во проблеми, бидејќи самиот признал дека некои соиграчи му кажале за коефициентот.