Поранешната министерка за внатрешни работи, Гордана Јанкулоска, по тричасовен распит во Основниот суд Скопје 1 за случајот „Тврдина“ изјави дека е сосема спокојна и дека не направила ниедно кривично дело.
Јанкулоска не одговори конкретно на новинарските прашања за прислушуваните разговори што ги објави опозицијата, ниту конкретно за уништувањето на опремата за прислушување во времето додека таа беше министерка за внатрешни работи, случај за кој беше на распит во судот.
Специјалното јавно обвинителство за овој случај бара да ѝ се определат мерки за претпазливост на Јанкулоска и на уште тројца осомничени, а за првоосомничениот, началникот на Петтата управа, Горан Грујевски, кој треба да се појави на распит во судот во 14 часот, СЈО бара притвор.
Јанкулоска, како и минатиот пат, повтори дека не се чувствува виновна и го обвини СЈО дека води политичка пресметка во име на опозициската СДСМ, со нивните неистомисленици на кои им се ставаат на товар конструирани случаи.
Според Јанкулоска, фактот што денеска обвинителите од СЈО побарале изземање на судијката од овој случај поради политички причини е потврда дека ова обвинителство работи под диктат на СДСМ за политички поени во јавноста.
Таа изјави дека за тврдењата на СЈО нема никакви докази и дека сите обвинувања се политичка конструкција, а не правна аргументација.
За уништувањето на опремата Јанкулоска не одговори конкретно, туку рече дека управувањето со таа опрема биле оперативно-техничко и тактички активности, кои ги воделе професионални лица и, според неа, би било неумесно таа да го коментира тоа од сегашна позиција, иако таа беше одговорен министер во тоа време.
„Изминатите девет години работев совесно и чесно според законите. Сосема сум спокојна и немам направено никакво кривично дело“, рече Јанкулоска.
Прислушуваните разговори коишто ги објави опзоицијата, а на кои се слуша какао Јанкулоска вели дека Министерството за внатрешни работи функционирало како штаб на ВМРО-ДПМНЕ, според Јанкулоска се сечени, монтирани и ставени во контекст којшто му одговара на лидерот на опозицијата, Зоран Заев.
„Но, народот е мудар и знае кој што сработил“, рече Јанкулоска.
Распитот за овој случај продолжува и се очекува одлуката на судијата, односно дали ќе се одредат мерки за претпазливост за Јанкулоска или притвор за Грујевски.
Кривичниот совет минатата недела ги укина решенијата на судијата на претходна постапка кој ги оцени како неосновани предлозите на СЈО за определување на мерка притвор за началникот на Петтата управа, Горан Грујевски, и мерките за претпазливост за останатите четворица осомничени
и дополнително ја оспори надлежноста на Специјалното јавно обвинителство за предметот за уништувањето на опремата за прислушување.
Грујевски, пред одлуката за аболиција од страна на Претседателот Ѓорге Иванов, помина неколку дена во притвор, но потоа ова мерка му беше заменета со куќен притвор. По одлуката за аболиција тој беше ослободен, но по поништувањето на истата случајот „Тврдина“ повторно влезе во судска процедура.
