На 21 април годинава Челзи Клинтон ќе добие награда за нејзиниот ангажман во Алијансата за поздрава генерација што се залага за поттикнување на децата да развијат здрави навики на исхрана.
Наградата што беше соопштена вчера се вика Lifetime Impact Award (Награда за влијание на Lifetime) бидејќи се доделува во партнерство со ТВ-мрежата Lifetime.
За жал, некои нестрпливи и слабо информирани твитерџии, а потоа и новинари и медиуми како The Hill, Heat Street и Death and Taxes, не успеаја да ја најдат поврзаноста.
Напротив, ја форсираа идејата дека Клинтон добива (со мала буква) награда за животно дело (lifetime achievement award) на само 37 години. Тоа веднаш наиде на бура од критики, особено од оние кои веќе не ја сакаат Челзи Клинтон.
До крајот на денот, откако сите сфатија дека станува збор за елементарна неписменост, почна бурата од исправки и извинувања. Правопис е зезната работа.
Овој инцидент укажа на неколку важни работи во врска со информирањето и известувањето денес.
Прво, најчесто заради сензационализам се поттикнува ширење на погрешни информации, познати како "лажни вести".
Второ, го потенцира проблемот, особено на онлајн медиумите, со проверување на фактите пред да се објави веста, бидејќи е "многу полесно" веста веднаш да се избрише или ажурира. Но, штетата е веќе направена. Ваквите информации и вести веќе циркулирале до одреден број луѓе и влијаеле врз формирањето на јавното и личното мислење.
Трето, поразително е новинар да не слушнал за ТВ-мрежата Lifetime, што укажува на многу пошироки непознавања од писменост.
