Северноамерикнските ривали се судрија во Торонто каде Американците доживеаја непријатен и неочекуван пораз.
САД досега редовно ја победуваше слабата Канада каде фудбалот е скоро аматерски спорт. Но, ноќеска на „БМО Филд“ стадионот во Торонто конечно дојдоа петте минути на Канаѓаните.
Натреварот беше во рамките на групата А од КОНКАКАФ Лигата на нации и тоа борба за прво место. Канада досега на двапати ја совлада Куба и со максимален скор го пречека ривалот од југот.
Алфонсо Дејвис, 18-годишниот играч на минхенски Баерн, донесе водство за Канаѓаните во 63-тата минута по асистенција на Скот Арфилд.
Осоколени по водството, Канаѓаните продолжија со нападите, но вториот гол дојде дури во судиското надополнување. Лукас Кавалини беше стрелец на голот.
Ова е прв триумф на Канада над САД по далечната 1985 година кога славеа со истиот резултат од 2:0 на пријателски натпревар игран во Ванкувер. „Јенките“ имаа 17 натпревари во низа без пораз од Канада.
Канада е прва во групата со 9 бода, САД има 3, Куба 0. До крајот САД има уште натпревар кој сигурно ќе го добие со слабата Куба во ноември, но претходно следува реванш со Канада во Орландо. Победникот од групата ќе оди во разигрувањето за шампион.
Во Б групата Мексико го совлада директниот ривал за првото место, Панама. Роберто Алварадо, Хосе Масијас и Родолфо Писаро погодија за Мексиканците, додек аединствениот гол на Панама беше автогол на Карлос Салседо. На табелата води Мексико со 6 бода, а Панама и Бермуда имаат по 3.
