Поминаа пет месеци откако Илон Маск го купи Twitter, платформа која претходно ги надмина сите очекувања благодарение на имиџот на највлијателна социјална мрежа.
Иако многумина го доведуваа во прашање тоа влијание и често укажуваа на токсичноста што доаѓа од тоа место, Twitter стана главна дестинација за новинарите и љубопитните кои сакаа да ги следат дискусиите на интересни луѓе кои токму таму создадоа заедница во која комуницираат меѓу себе или со јавноста, се наведува во неодамнешната статија на TechCrunch под наслов „Twitter is dying“ (Twitter умира).
„Тоа беше место каде елементите на социјалната мрежа беа во втор план, првенствено беше место каде луѓето доаѓаа за информации. Секако, тоа не го исклучува фактот дека станува збор за неофицијална апликација за запознавање, но во денешно време, помалку или повеќе, таква е речиси секоја апликација на која комуницирате“.
Со текот на годините, многумина се шегуваа дека е неверојатно што Twitter е бесплатен поради количината на информации до кои лесно можете да пристапите.
Но, шегата стана реалност и Twitter повеќе не е слободно место, бидејќи Маск одлучи да промени сè што ја правеше оваа платформа непроценливо место за многумина.
Тој ги избрка експертите, ги исплаши познатите личности и почна да ги малтретира новинарите, а во исто време наградува лоши актери, спамери и сплеткаџии на кои им одговара новосоздадената атмосфера на информативен вакуум.
„И не е важно дали се работи за неспособност или намерна саботажа на Маск, резултатот е ист - Twitter умира.“
„Секој потег на Маск го претвора Twitter во сенка на она што беше некогаш. Со одлуките за деблокирање на профилите на нацисти, за продолжување на токсичниот тип на комуникација, наплата за верификација или блокирање на профилите на новинарите, Маск ја уништи вредноста на Twitter за рекордно кратко време, а секоја одлука предизвикува дополнителен одлив на експерти и корисници“.
Од први април почна следната, некои би рекле и последната фаза на уништување, откако стапи на сила наплатата за верификуван статус, што значи дека ќе бидат присутни сите оние што се подготвени да платат по 8 долари месечно.
