По синоќешниот пораз од Сирија, Марчело Липи реши да ја преземе одговорноста и се повлече од селекторското столче во репрезентацијата на Кина.
Кинезите вчера играа квалификациски натпревар за пласман на Мундијалот во Катар 2022 против репрезентацијата на Сирија на гости. Поради безбедносната ситуација во Сирија, натпреварот се одигра на неутрален терен во Дубаи, ОАЕ.
Осама Омари ѝ донесе водство на Сирија во 19-тата минута, но единаесет минути подоцна избраниците на Липи израмнија преку Ву Леи.
Сепак, во 76-тата минута Сирија доби подарок гол за победа откако Чан Линпен ја затресе сопствената мрежа. Поразот ја прели чашата на Липи, кој претходно веќе еднаш имаше дадено оставка, но потоа Кинезите го предомислија.
„Мојата плата е многу висока и јас ја преземам вината. Поднесувам оставка како селектор на Кина“, кратко изјави Липи чии зборови ги пренесува кинеската новинска агенција Xīnhuá (新华).
Се чини овој пат разделбата е неминовна. Липи е на чело на Кина од октомври 2016, а си даде оставка во јануари годинава по поразот од 3:0 од Иран во четврт-финалето на Азискиот куп. Неколку месеци беше заменет од Фабио Канаваро пред повторно Кинеската федерација да го постави за селектор во мај.
Липи одамна е разочаран од квалитетот на кинескиот фудбал и малиот избор на добри фудбалери кои ги има на располагање.