Сенегалецот Садио Мане за сума од 36 милиони евра од Саутемптон се пресели во Ливерпул. Мане ги мина лекарските прегледи, а ден потоа потпиша договор со трофејниот клуб.
Сенегласкиот репрезентативец Садио Мане е третото најскапо засилување во историјата на Ливерпул, по Енди Керол и Кристијан Бентеке, а веќе четврто за тимот на Јирген Клоп во преодниот рок.
Пред Мане, уште во јануари Ливерпул ги договори Камерунецот Жоел Матип кој од Шалке пристигна како слободен играч и Србинот Марко Грујиќ од Црвена ѕвезда, за кого клубот плати седум милиони евра. По завршувањето на сезоната на „Енфилд“, за сума од шест милиони евра, пристигна голманот на Мајнц, Лорис Кариус.
Мане, кој е поранешен играч на Мец и Салцбург, е петтиот играч кој во последните три години од Саутемптон се сели во Ливерпул. Претходно Саутемптон добро заработи од продажбите на Адам Лалана (25 милиони фунти), Дејан Ловрен (20 милиони фунти), Рики Ламберт (4 милиони фунти) и Натанијел Клајн (12,5 милиони фунти).
Сенегалецот во изминатите две години одигра 75 натпревари за Саутемптон, на кои постигна 25 голови.