Македонските ракометари ќе играат во наредната фаза на ЕП во Полска, откако во решавачкиот меч во А групата одиграа 27:27 (13:13) против репрезентацијата на Србија. Македонија во наредната рунда ќе влезе без бодови, а покрај „црвено-жолтите“ од А групата натаму одат Франција и Полска.
Мечот во Краков донесе вистинска драма на две селекции кои силно го посакуваа пласманот во наредниот круг. Ниту една селекција во текот на натпреварот не создаде предност поголема од два гола, а во вториот дел предноста на двата тима никогаш не беше поголема од еден гол.
Македонија против Србија одигра нервозно, особено во првата половина од првиот дел, бавно во нападот, кога Србите целосно го изолираа Кире Лазаров. Густата одбрана Србите најдобро ја искористија крилата Манасков и Георгиевски кои заедно постигнаа 15 голови.
На крајот, големата борба беше решена во последните десет секунди, прво Ѓукиќ погоди за водство на Србија, а потоа Манасков врати во последната секунда за израмнување и пласман на Македонија во наредната рунда.
Србите го отворија мечот со голот на Шешум, но Македонија возврати преку Манасков и Кире Лазаров, по што започна да се игра гол за гол сé до 13. минута (5:5), тогаш Србите постигнаа два гола (Шешум и Никчевиќ) и првпат стекнаа предност од два гола. Во овој период од играта Станиќ му одбрани два седмерци на Кире Лазаров и беше најзаслужниот за водството на Србија.
Исто така, „црвено жолтите“ не можеа да се справат со брзите бекови на Србија, која во првата половина од првото полувреме шест од седумте гола постигна од бековските позиции.
Македонија во втората половина од првиот дел ја користеше фокусираноста на српската одбрана врз Лазаров, па во нападот погодуваа крилата Георгиевски и Манасков.
Во последните пет минути Србија избори нерешено, Марсениќ и Ненадиќ постигнаа голови, Лазаров не реализираше чист зицер, Георгиевски постигна гол за 13:12, а Србија израмни на 13:13 од седмерец преку Ненедиќ по истекот на времето.
Големата борба продолжи и во второто полувреме. Шешум погоди за предност на Србија, а Македонија возврати преку Георгиевски и Лазаров, потоа Никчевиќ израмни на 15:15.
Нашата одбрана немаше решение за расположениот Ненадиќ, кој за 16. минути во вториот дел постигна четири гола, но голгетерската форма од првиот дел ја задржа Манасков за 19:20 (46. минута).
На 90 секунди до крајот Србија не реализираше напад за два разлика, па следуваше долг напад на Македонија, во кој Миркуловски, на 45 секунди до истекот на времето, изнуди исклучување на Марсениќ.
Нападот на Македонија продолжи со скок шут на Лазаров, Станиќ одбрани, но топката ја прифати Стоилов и израмни на 26:26, на 20 секунди до крајот.
По тајмаутот на српскиот селектор, Србите изведоа брза акција, нашата одбрана беше премногу статична, а Ѓукиќ поентираше под Ристовски на десет секунди до крајот. Последниот напад Македонија го играше без голман, со седуммина во поле, акцијата изработена за Манасков кој погоди за израмнување и за пласман на Македонија во вториот круг.
Дејан Манасков со десет голови беше најефикасен на мечот, Георгиевски постигна пет, Лазаров и Стоилов по четири гола. Србија ја предводеа Ненадиќ и Шешум со по седум гола, односно голманот Станиќ со 13 интервенции.
