Германската канцеларка Ангела Меркел изјави дека не се откажува од политиката на отворени врати за мигрантите и покрај низата напади во последните десетина дена извршени од лица кои бараат азил.
Меркел ја брани политиката на отвореност кон имигрантите и својот слоган „„Ќе успееме“ со кој го одбележа отворањето на границите и примањето на околу 1,1 милиони баратели на азил само минатата 2015 година, и заклучи дека исламистичките напади не ја довеле во прашање нејзината решителност во давањето засолниште на оние на коишто заштитата им е потребна.
„Никогаш не реков дека ќе биде едноставно. Но јас и денеска, како и пред една година, сум убедена дека ќе ни појде од рака да ја исполниме историската задача. Тоа претставува голем предизвик во време на глобализацијата, и јас сум уверена дека ќе ни успее“, рече Меркел.
Таа ги осуди последните напади од кои два имаа исламистичка заднина, а во три од четири напади, сторителите се бегалци.
„Исламистичките терористи се обидуваат да го оспорат начинот на кој ние живееме. Тие шират омраза меѓу верите и на тоа решително ќе се спротивставиме“, порача Меркел осврнувајќи се на терористичките напади во Европа во последниот период.
„Овие напади потресуваат и депримираат. Тука се кршат цивилизациски табуа. Нападите се случија на места на коишто можел да се најде секој од нас“, рече Меркел.
Германската канцеларка нагласи дека по нападите од последните денови треба да се преиспитаат мерките кои би требало да служат за безбедноста во земјата.
Меѓу мерките кои би требало да го зголемат нивото на безбедност во Германија, канцеларката го најави зголемувањето на бројот на вработените во безбедносни служби, формирање биро за информатичката безбедност со цел подобро да се следат информатичките комуникации, како и подобра соработка со странските разузнавачки служби. Натаму, се планира формирање специјална датотека во којашто ќе бидат чувани податоци за влегувањата и излегувањата од земјата.
Во врска со бегалците кои последните години влегле во Германија, Меркел најави мерка за олеснување на протерувањето на лицата за кои не постојат правни основи да останат во земјата, како и систем што би требало да овозможи откривање на радикализирањето на поединци во раната фаза.