Триесет и четири лица загинаа, а 125 се ранети од кои 19 се во критична состојба, откако синоќа експлодира автомобил бомба во трговски кварт на турската престолнина Анкара, соопшти министерот за здравство Мехмет Муезиноглу.
„Триесет луѓе загинаа на самото место, четворица починаа во болница. Претпоставуваме дека меѓу загинатите се и еден или двајца од терористите самоубијци“, изјави министерот Муезиноглу за новинарите во Анкара.
Одговорноста за нападот досега не ја презема ниедна група или организација, а министерството за внатрешни работи најави дека името на организаторите на нападот ќе го објави во понеделник, кога ќе заврши истрагата.
Турскиот претседател Реџеп Тајип Ердоган изјави дека нападот нема да ја намали „решителноста на Турција во борбата против тероризмот“ и дека државата „никогаш нема да отстапи од правото да ги брани своите граѓани“.
„Терористичките организации напаѓаат невини цивили, бидејќи губат во борбата против нашите безбедносни сили“, истакна Ердоган и додаде дека Турција станала цел на терористите поради нестабилноста во регионот последните години.
Според медиумските извештаи, експлозијата се случил во паркот Ѓувен, во близна на автобуската станица на авенијата Ататурк во квартот Кизилај, во центарот на Анкара, околу 18.35 часот по локално време. Телевизијата TRT наведува дека автомобилот бомба, за што се верува дека ја активирал самоубиец, експлодирала покрај автобуси со по околу 20 патници.
Очевидци велат дека чадот можел да се види од оддалеченост од 2,5 километри, како и дека во областа има многу целосно изгорени автомобили.
Оваа експлозија одекна помалку од еден месец од нападот со автомобил бомба во центарот на Анкара во близина на штабот на турската армија, во кој загинаа 29 луѓе, најмногу високи офицери кои се превезуваа со воени автобуси.