Најтрофејниот олимпиец во историјата, пливачот Maјкл Фелпс од САД, ја зголеми својата колекција олимписки одличја, откако ги освои златата на трките 200 метри делфин и 4x200 слободно и сега има 21 медали.
Американецот до јубилејниот дваесетти медал стaса со победата над големиот ривал и бранител на титулата Чад ле Клос од Јужна Африка во трката на 200 метри делфин, а потоа му помогна на тимот на САД да запише убедлива победа во штафетата.
Фелпс во трката која беше врв на вечерта му се одмазди на Ле Клос за поразот во Лондон пред четири години и пливаше 1:53,36, а Јужноафриканецот не стигна ни до пиедесталот со време 1:54,06. Среброто го освои Јапонецот Масато Сакаи 1:53,40, а бронзата Тамаш Кендреши 1:53,62.
Американецот првото вртење го направи по Унгарецот Ласло Чех, но набрзо го презеде водството и не го испушти до крајот. Сакаи во последните 50 метри додаде гас, но сепак немаше сила да го загрози Фелпс во драматичниот финиш.
За разлика од таа трка, онаа на 4x200m слободно, беше лишена од возбуда. Американскиот тим во состав Двајер, Хас, Лохти и Фелпс темпото го изгуби дури во третата промена, но дотогаш имаа солидна предност, која на крај Фелпс само ја потврди.
Сад имаше време од 7:00,66, а зад нив беа Британците 7:03,13, додека бронзата ја освои Јапонија 7:03,50.
Фелпс на овие Олимписки игри зеде злато и во дисциплината 4x100 слободно, а може да стигне уште до две медаљи, на 10 0 метри слободно, повторно против Ле Клос, ноќта меѓу петокот и саботата, и на 200 метри мешано, ноќта меѓу четврток и петок.
Неговата примарна цел веќе е исполнета, а тоа е титулата на 200 метри делфин, која ја испушти во Лондон.