Легендарниот филипински боксер Мани Пакјао (40) синоќа во Лас Вегас го порази 11 години помладиот Американец Едриен Бронен со едногласна одлука на судиите.
Со тоа, Пакјао без поголеми проблеми го задржа појасот од WBA асоцијацијата во категоријата велтер, во неговата 70 борба и воедно прва откако наполни 40 години. Сега Филипинецот има скор од 61 победа, од кои 39 пристигнаа со нокаут на противникот. Притоа има и седум порази, како и две ремија.
„Дадов сѐ од себе во подготовката за овој меч и поради тоа сум многу среќен. Бог ми даде здравје и затоа можам да боксувам на 40 години. Можев да бидам агресивен во оваа борба, но од аголот ми рекоа да чекам на контра“, изјави Пакјао по мечот.
Филипинецот по борбата го предизвика Флојд Мејведер, кој му го нанесе последниот пораз пред четири години.
„Порачајте му да се врати во рингот и да се бори со мене. Подготвен сум и сакам да се сретнам повторно со него во рингот, доколку тој е подготвен да му се врати на боксот“, порача Пакјао.
