Boston Dynamics го пензионираше својот популарен робот Atlas оваа недела и штотуку го претстави истоимениот наследник.
Станува збор за целосно редизајнирано, електрично решение, во кое инженерите имплементирале нови алатки за вештачка интелигенција и машинско учење.
Претставувањето на електричниот Atlas го означува и почетокот на комерцијализацијата на хуманоидниот робот, кој првично ќе се тестира во фабриките на Hyundai.
Стариот Atlas користеше хидраулични системи кои беа гласни и не многу еластични - недостатоци што го спречуваа да биде вклучен во работната сила заедно со луѓето. Сепак, новиот атлас користи електрични актуатори кои се потивки, поефикасни и имаат поголем вртежен момент.
Како и неговиот претходник, електричниот Atlas има хуманоидна форма. Дизајниран е да има две раце и нозе, како и стилизирана глава која складира различни сензори и камери за набљудување на околината.
Сепак, неговата хуманоидна фигура не го ограничува само на човечките движења, туку Boston Dynamics се обиде да го направи што е можно поефикасен. Овој пристап му овозможи голема слобода на движење, што му овозможува да ги ротира телото и екстремитетите за 360 степени. Тоа значи дека е многу агилен и подвижен, а меѓу другото може да се врти и додека стои во место.
Boston Dynamics допрва треба да открие повеќе детали, а дотогаш, најновото видео е најдобар показател за тоа како се движи Atlas користејќи ги новите актуатори.
Boston Dynamics не само што го редизајнираше хардверот, туку и софтверските системи што го движат хуманоидниот робот. Благодарение на вештачката интелигенција и машинското учење, Atlas може да се тренира за различни задачи, а неговото набљудување на околината е подобрено со цел подобро да се прилагоди на сложените ситуации во реалниот свет.
Секако, не изостана ниту компатибилноста со другите роботи на Boston Dynamics, па за потребите на една компанија Atlas може да се комбинира со кучето робот Spot и логистичкиот робот Stretch.
Компанијата продолжува да спроведува различни тестови за подобрување на флексибилноста на електричниот Atlas на работното место, а неговата прва работна задача ќе биде во фабриката за автомобили Hyundai, матичната компанија на Boston Dynamics.
Atlas не е единствениот хуманоиден робот кој доби шанса да работи во фабрика за автомобили. Претходно, BMW одлучи да го имплементира роботот Figure 01 во својата работна сила.
