Поранешната Мис на светот и актерка Пријанка Чопра викендов се омажи за американскиот пејач Ник Џонас на раскошна свадбена прослава.
На прославата имаше американски и индиски обичаи, како и католичка и хинду венчавка, а славјето траеше пет дена со паради, забави и огномети.
Пријанка (36) носеше венчаница на Ралф Лорен што била рачно изработувана 1.826 часа, а Ник (26) носеше костум на истиот дизајнер.
Потоа невестата облече традиционална индиска носија во црвена нијанса, на дизајнерот Сабјасачи Мухерџи.
Сепак, Пријанка се најде на удар на активистите на правата на животните ПЕТА бидејќи во прославата користела животни.
Ник на свадбата се појави на бел коњ, а гостите ги забавуваа два слона со седла.
„Пријанка очигледно не била известена дека учествува во суровост кон животните“, рече Манилал Валијате од ПЕТА Индија.
„Искористувањето на животните кои немаат избор не те прави величествена или гламурозна. Напротив, те прави сурова“, рече тој.
ПЕТА го објави својот приговор на социјалните мрежи и нагласи дека „нивниот среќен ден не беше среќен за животните“.
