Во Центарот за обука во Идризово по едногодишна обука свечено беа промовирани новите 654 полициски службеници, од кои 143 се жени.
Министерот за внатрешни работи Оливер Спасовски им порача да бидат бескомпромисни чувари на редот и законите, но и на професионалната чест и достоинството.
„Интегритетот не се гради со подмитливост, со поткупливост, со непочитување на законите или со селективна правда, со злоупотреба на должностите и службените овластувања или слични такви стандарди и вредности кои со години наназад ја доведоа Македонија до работ на амбисот“, рече Спасовски.
Одговарајќи на новинарско прашање за последните кадровски смени во МВР, Спасовски рече дека досега во МВР се сменети 11 началници, а останува можност за промена уште на четворица.
Тој потсети дека лани за 33 полициски службеници кои не беа примени на работа во МВР, поднел барање до Министерството за финансии за одобрување за нивно вработување.