Volkswagen ги објави првите фотографии и технички детали за освежениот пикап модел Amarok, Кој во салоните треба да се појави кон крајот на септември. VW Amarok се појави на пазарот во 2010 година, па редизајнот беше неопходен за возилото да остане конкурентно до појавата на втората генерација.
Кај освежениот модел, има мали разлики кај предниот и задниот браник, светлосните групи и маската на ладилникот, а во понудата се најдоа и нови алу-фелни.
Промените во кабината се позабележителни, па командната табла повеќе потсетува на внатрешноста на актуелните патнички автомобили на брендот, отколку на комерцијално возило. Екранот на мултимедијалниот систем е подигнат на врвот на централната конзола, а отворите за вентилација сега имаат поинаква форма.
Изменети се и дизајнот на контролите за климата, а купувачите ќе можат да добијат и ergoComfort предни седишта што VW досега ги користеше само во патничките возила.
Една интересна новина е и елегантниот внатрешен ретровизор без рамка, а во понудата на освежениот модел ќе биде и Park Pilot системот кој ги комбинира задните паркинг сензори со камера за уште полесно паркирање.
Најголемата новост сепак е воведувањето на 3.0 литарскиот V6 турбо-дизел мотор кој е достапен во верзиите со 163 коњски сили, со 204 како и со 224 коњи. Најсилната верзија, развива максимален вртежен момент од 550Nm што е многу подобро во однос на претходниот најсилен 2.0 би-турбо мотор со 180 коњи.
Основната верзија ќе има заден погон, а ќе биде достапна и 4motion верзијата со погон на сите четири тркала.
Најевтината верзија ќе чини 25.720 евра, додека во врвот на понудата ќе биде моделот Amarok Aventura со моќниот V6 турбо-дизел мотор, погон на сите четири тркала и автоматски менувач со 8 брзини, кој ќе чини 46.525 евра.