Кинеската агенција Xinhua соопшти дека најголемиот радиотелескоп во светот вчера започна со работа, поточно со истражување на вселената во потрага по знаци на живот. Станува збор за телескопот FAST, односно вселенска програма вредна милијарда долари.
Само изградбата на телескопот чини 180 милиони долари, а за потребите на проектот биле преселени 8.000 луѓе од нивните домови за да се создаде потребниот радиус. Долг е 500 метри, опремен со 4.450 панели. Претходно, за најголем радиотелескоп важеше оној во Опсерваторијата во Порторико, со дијаметар од 300 метри.
Проектот за прв пат бил предложен пред 17 години од кинеските астрономи, а изградбата траеше 5 години при што беа потрошени 180 милиони долари за структурата. Агенцијата го опишува телескопот како „супер сензитивно уво“ со способност да забележи слаби сигнали од вселената. Во неодамнешните тестирања FAST детектирал електромагнетни бранови оддалечени 1.351 светлосни години од Земјата.
