Кристијано Роналдо ги демантира шпекулациите околу можниот трансфер во ПСЖ или Манчестер Сити, со напомена дека кариерата ќе ја заврши во мадридски Реал.
„Ќе видиме дали ќе го продолжиме договорот по завршувањето на сезоната. Реал би направил добар потег доколку го продолжи мојот договор. Сакам да останам овде“, рекол Роналдо во клупскиот камп, кој се наоѓа во северниот дел на Мадрид.
„Имаше добри и лоши моменти. Пред четири години не бев среќен, сега сум задоволен и не гледам дека некој тим е подобар од Реал. Останатите клубови нека ме заборават“, дополнил Португалецот.
Роналдо има договор со Реал до 2018 година, а оваа сезона има постигнато 47 голови на 51 одиграни натпревари.
„Се поистоветувам со Зинедин Зидан. Тој е паметен човек, не зборува многу, но многу позитивно делува на тимот. Се надевам дека ќе ја освоиме Лигата на шампионите и дека тој ќе остане тренер и во наредните сезони. Како тренер нема искуство, но добро го пробива својот пат“, рекол Роналдо.
Во сабота, Реал против Атлетико ќе игра во финалето во Лигата на шампионите.
„Би бил неуспех ако не ја освоиме Лигата на шампионите. Ако победиме сезоната ќе биде одлична, ако загубиме ќе биде промашување. Но ќе победиме. Ќе биде тоа врв на сезоната“, заклучил Португалецот.