Директорот на германскиот автомобилски бренд, Херберт Дајс, вели дека трендот на намалување на автомобилските мотори е на својот крај.
Со години, автомобилските производители нудат помали мотори од кои испорачуваат колку што е можно повеќе сила. Меѓутоа во октомври минатата година Reuters пишуваше дека VW, General Motors и Renault планираат да стават крај на овој тренд и да почнат да ги зголемуваат моторите.
Во интервјуто за британски Telegraph, Херберт Дајс вели дека Volkswagen нема да произведува помали мотори од 1.0 литарскиот бензинец со три цилиндри.
Исто така според него, дизел моторите на VW нема да бидат помали од 1.6 литри.
„Трендот на даунсајзингот е завршен бидејќи со понатамошното намалување на работната зафатнина се јавува тенденција на пораст на штетните емисии" - вели Дајс и посочува дека малите дизел мотори едноставно не се економични.
Тој додава и дека во иднина цената на дизел возилата ќе се зголеми бидејќи ќе мора да се задоволат построгите стандарди за штетните гасови, па смета дека дизелите во иднина нема да бидат толку популарни.