По дури 25 години се случи севкупен победник да биде скокач без да забележи триумф на една од четирите скокалници од новогодишната турнеја. Јапонецот Рјоју Кобајаши го освои Златниот орел откако на сите четири скокалници заврши втор.
Во возбудлив финиш денеска во австриски Бишофсховен, во една вистинска зимска идила, домашниот скокач Штефан Крафт победи на последната скокалница и се погрижи да има различен победник на сите четири.
Како што наближуваше крајот, Словенецот Анже Ланишек, победникот од Гармиш-Партенкирхен, го презеде првото место откако го направи најдолгиот скок денеска од 141 метар.
На ред дојде домашниот скокач Штефан Крафт. Скокна еден метар помалку од Ланишек, но му го зеде првото место поради подобриот скок во квалификациите.
Финалето заврши со скокот на најдобриот од квалификациите и воедно лидер во генералниот пласман, Рјоју Кобајаши, кој беше извесно дека ќе биде севкупен победник, но се надеваше дека конечно ќе го скрши малерот и ќе победи на една скокалница. Скокна 139 метри, што повторно беше доволно само за второ место.
И порано се случувало освојувач на новогодишната турнеја да биде скокач без победа на една од четирите скокалници, но последен пат тоа се случи пред дури 25 години кога во 1998/1999 победи Финецот Јане Ахонен. Ланскиот победник, Норвежанецот Халвор Егнер Гранеруд, му го предаде Златниот орел, кој е трет за Јапонецот бидејќи триумфираше и во 2018/2019 и 2021/2022.
Потсетуваме, во Оберстдорф победи Андреас Велингер, Анже Ланишек беше најдобар во Гармиш-Партенкирхен, а во Инсбрук првото место замина кај Јан Херл.