Ситуацијата на македонско-грчката граница денеска е тензична, откако група мигранти се судри со македонската полиција по обидот да се прекачат преку оградата што е поставена на границата, јавува Reuters.
Македонската полиција употреби солзавец по што мигрантите почнаа да фрлаат со камења кон полицијата, пренесува агенцијата која одбележува дека грчката полиција не се вмешува во судирите. Грчки полициски извор изјавил дека има тензија, но одбил дополнително да коментира.
Македонски извор кој барал да остане анонимен, изјавил дека поголема група го напуштила кампот Идомени во утринските часови и се упатиле кон оградата со цел да ја минат.
„Тие фрлаа со камења врз македонската полиција. Полицијата одговори со созлавец“, изјавил човекот.
До инцидентот дошло откако група од повеќе од 500 луѓе поверувала на шпекулациите дека границата е отворена. Reuters наведува дека откако тоа било негирано од македонските полицајци повеќе од сто мигранти, меѓу кои и деца, се обиделе да се прекачат преку оградата.
Од грчката страна на границата во областа Идомени, се проценува дека во моментов има повеќе од 10.000 бегалци и мигранти кои останаа таму, откако кон средината на февруари земјите од балканска бегалска рута, вклучително и Македонија, го следеа примерот на земјите од Европската унија и ги затворија границите.