Македонија

Температури до 30°C, попладне со услови за локален дожд

18. октомври 2019 - 7:55 | МИА

Времето во Република Северна Македонија ќе биде сончево и топло со мала до умерена облачност и со слаб до умерен ветер претежно од јужен правец.

Во попладневните часови ќе има услови за краткотраен локален дожд и ретки грмежи, особено во јужните делови на земјава.

Утринската температура ќе се движи од 4 до 13, а  дневната од 24 до 30 степени.

Во Скопје, сончево и топло со мала до умерена облачност и со слаб ветер од јужен правец. Утринската температура ќе се спушти до 11, а дневната ќе се искачи до 27 степени.

Продолжува периодот на топло време со натпросечни дневни температури за овој период од годината. Во петок и во сабота на места ќе има зголемена облачност и услови за слаб локален дожд.

Екстремно топло, со потпросечни врнежи во октомври

Екстремно топло со потпросечни врнежи се карактеризира времето во втората половина од октомври.

Од УХМР наведуваат дека според измерените вредности за среднодневната темпрература на воздухот првата декада од октомври се категоризира како вообичаена, но што се однесува на втората декада, земајќи предвид и прогнозираните температури до крајот на втората декада, се категоризира како екстремно топла, освен на западниот планински дел и се очекува да го надмине многугодишниот просек од три до пет степени.

Рекордните вредности на максималната температура на воздухот на повеќето метеоролошки станици во октомври не ги надминуваат многугодишните апсолутни вредности.

Највисоката температура во октомври годинава е измерена во Гевгелија од 32,6 степени, додека максималната измерена досега на ова мерно место е 35,4 степени. Максимално измерените темпратури во периодот од 1951 до 2018 година за октомври се 34,5 степени во Демир Капија, Штип 34,1, Скопје 33,6, Струмица 32,2, Прилеп 32,3, Битола 31,8, Крива Паланка 31,3, Охрид 28,9, Берово 31,5, Маврово 27,3 и Лазарополе 27,4 Целзиусови степени.

Коментирај