Новото правило за офсајд што ФИФА го тестираше во изминатиот период влијаеше на зголемување на бројот на голови за речиси 10 проценти.
Пред неколку месеци, шефот за развој на фудбалот на ФИФА, Арсен Венгер, предложи тестирање на потенцијално ново правило за офсајд, што и беше направено во италијанската младинска лига во текот на април и мај.
Правилото е дека напаѓачот нема да биде во офсајд сѐ додека кој било дел од неговото тело со кој може да игра со топката е во линија со одбранбениот играч на противничката екипа од одбраната.
Според тоа правило, играчот би бил во офсајд само доколку има визуелно одвоен простор меѓу него и дефанзивецот.
Но, правилото е и малку контроверзно и тешко веројатно дека ќе биде усвоено. Имено, според ова правило офсајдот на Кристијано Роналдо против Вотфорд нема да биде офсајд. Фудбалските љубители не се задоволни од такво правило бидејќи сепак преочигледно е дека Роналдо беше во офсајд.
Според првите резултати, во италијанската Примавера (натпреварување за играчи под 18 години) има зголемување од 9,8% на голови по натпревар.
Во првите 23 кола, според вообичаените правила за офсајд, на 177 натпревари беа постигнати 632 гола (3,57 гола по натпревар), а со новите правила беа забележани 247 гола на 63 натпревари (3,92 гола по натпревар).
Во просек на секои три натпревари се забележуваше по еден гол повеќе од претходно, па на напаѓачите им се допадна ова ново правило, додека дефанзивците не го делат истото мислење.
