Кошарка

Торонто повторно го презеде водството во НБА финалето

6. јуни 2019 - 10:21 | К.З.

Изгледа дека животот во финалето без Клеј Томпсон и Кевин Дурент е тежок за тимот на Голден Стејт Вориорс, кој синоќа доживеа нов пораз од Торонто Репторс. Канадскиот тим дојде до гостинска победа, што може да се покаже како клучен момент во финалната серија.

Тимот на Торонто Репторс, предводен од одличната партија на Кавај Ленард, го победи шампионот Голден Стејт Вориорс со резултат 123:109 и повторно го презеде водството во финалето.

Првата постава на Репторс не ни можеше да замисли подобро сценарио за синоќешниот натпревар – сите петорица стартери постигнаа двоцифрен број поени, што се покажа како пресудно во победата над Вориорс. Ленард повторно се покажа како лидер на тимот со 30 поени, 7 скока и 6 асистенции, но овојпат имаше и одлична поддршка во Кајл Лаури (23 поени), Дени Грин (18 поени), Паскал Сијакам (18 поени) и Марк Гасол (17 поени).

Шампионскиот тим на Вориорс се наоѓа во криза предизвикана од отсуствата на тројца играчи од составот – Кевин Дурент, Клеј Томпсон и Кевон Луни. Од една страна, Стеф Кари се искачи на сосем друго ниво и синоќа забележа 47 поени, 8 скока и 7 асистенции, но од друга страна, тимот нема барем уште една стандардна офанзивна опција во составот.

Следниот натпревар повторно се игра во Оукленд, каде Вориорс ќе се обидат да го искористат домашниот терен за да ја израмнат серијата пред таа да се пресели во Торонто.

Коментирај