САД ја повикаа Турција да прекине со артилериските гранатирања врз силите на сириските Курди и на сириската армија во северниот дел од Сирија, откако Анкара потврди дека ги гаѓала позициите на курдските сили, а потоа извела нови гранатирања врз другата сириска северна покраина Латакија.
„Ги повикавме сириските Курди и другите сили поврзани со PYD (Курдската партија на демократското единство) да не го искористуваат метежот за да дојдат до нови територии. Покрај тоа ги видовме информациите за артилерискиот оган од турската страна на границата и ја повикавме Турција да го прекине огнот“, изјави портпаролот на Стејт департментот, Џон Кирби.
„Вознемирени сме од ситуацијата на север од Алепо и работиме на тоа за да се намали напнатоста од сите страни“, изјавил Кирби.
Турција изведе два одвоени артилериски напади врз сириска територија. Во првиот напад беа гаѓани позициите на Единиците за одбрана на народот (YPG) кои во северната покраина Алепо, десетина километри од турската граница ја заземаа пред два дена од сунитските бунтовници воздухопловната база Минех и контролираат важни правци кои го оневозможуваат снабдувањето со оружје и луѓе бунтовниците кои ги поддржува Турција.
Во вториот напад, турската артилерија ги гаѓала позициите на сириската владина армија во покраината Латакија.
Не се објавени никакви поединости за видот на турските гранатирања, а се претпоставува дека станува збор за оган од јуришни тенкови.
Турскиот премиер Ахмет Давутоглу ги потврдил нападите врз PYD, но не сакал да зборува за детали. Алудирајќи на курдските сили, тој PYD ги нарекол „терористичка група поврзана со сирискиот режим кој учествува во руските воздушни удари врз цивили“.