„Судот потклекна на бескрупулозниот и отворен притисок на опозицискиот СДСМ, кој нема никаква врска со правдата и почитувањето на законите“, објави владејачката партија неколку часа откако Основниот суд Скопје 1 одлучи да ја да ја прифати жалбата на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите (СЈО), и на битолскиот градоначалник Владимир Талески, кој е од редовите на ВМРО-ДПМНЕ, опфатен со предметот познат како „Транспортер“ да му одреди 30-дневен куќен притвор.
„Само неколку часа, откако СДСМ се закани, и најави лични тужби против судиите, Кривичниот суд ја измени сопствената одлука, и наместо обезбедување присуство, изрече мерка притвор. Оваа одлука не е базирана на закони и факти, туку е одлука донесена под жесток политички притисок и нема никаква врска со реалната состојба“, тврдат од владејачката партија.
Според ВМРО-ДПМНЕ, ваквата постапка е поврзана „единствено е поврзано со политичките игри на СДСМ и додворувањата на судството кое отсекогаш е мета и посакувана цел на СДСМ, но кога не им успева додворувањето и партиското лобирање почнуваат со заканите и притисоците“.
Според владејачката партија, илузорно е да се смета дека Владимир Талески ќе ја напушти државата, и ќе се даде во бегство, нешто за што „не постои никаква индиција ниту здраворазумски факт“.
„Ваквата одлука на Кривичниот суд има политичка намена, за кокетирање во јавноста од страна на СДСМ во отсуство на реални резултати и вистински дебакл на нивните антидржавни политики. Целокупното работење на градоначалникот Талески е базирано врз дословно спроведување на законот за јавни набавки“, се додава во реакцијата.