Volkswagen пред стартот на автомобилскиот саем во Париз го претстави концептот I.D. кој ќе биде основа за сериски електричен модел со достапна цена. Германската компанија со ова се подготвува за новата автомобилска ера, а првиот чекор ќе биде масовно производство на сериската верзија на овој концепт.
Концептот е замислен за на прв поглед да се разликува од конвенционалните Volkswagen автомобили со мотори со внатрешно согорување, а новиот дизајнерски јазик ќе биде присутен и кај другите електрични модели.
Прв од електричните модели ќе биде сериската верзија на овој концепт, а старот на продажбата треба да се случи во текот на 2020 година. Од VW се надеваат дека овој модел ќе направи револуција на пазарот слична на онаа што ја направија прво со моделот Буба, а потоа и со Golf во втората половина на 20-тиот век.
За да успеат во тоа, електричниот модел ќе мора да биде ценовно достапен, но и да има возни својства слични на современите фамилијарни дизел и бензински модели. Во таа насока, германската компанија најавува дека цената ќе биде колку дизелската верзија на Golf, а автомобилот би можел да помине 400 до 600 километри со едно полнење.
Електромоторот ќе испорачува околу 170 коњски сили, а компанијата не отрки други технички детали за моделот. Според димензиите, автомобилот ќе припаѓа на компактната патничка класа, со надворешност слична на Golf, но поради тоа што нема класичен мотор, ќе има пространа внатрешност на ниво на Passat.
Сите функции во внатрешноста би требало да бидат достапни преку екраните осетливи на допир, а не би тербало да има никакви копчиња. Автомобилот постојано ќе биде поврзан на интернет, а самиот ќе ги презема сите нови надградби и подобрувања.
Концептот исто така ја најавува и имплементацијата на автопилот кој треба да овозможи автономно возење во сериската верзија од 2025 година.
