Претседателот на СДСМ, Зоран Заев придружуван од генералниот секретар Оливер Спасовски, оствари средба со лидерот на Обединети за Македонија, Љубе Бошковски.
На средбата, како што се вели во соопштението од СДСМ, се разговарало за соработката во рамки на широкиот демократски фронт и надминување на политичката криза преку одржување на фер и кредибилни избори во Македонија со исполнување на сите услови.
Претседателот Заев го изрази своето задоволство што повторно го гледа Бошковски на слобода и напомена дека политички монтираните случаи мора да престанат.
„Вистината секогаш победува. Тоа треба да му е јасно на секој. Заедно со граѓаните им ставаме крај на политички монтираните случаи, реализирани преку партизираното судство. Оваа борба за правда и правичност е искрена и таа ќе вроди со плод. Во Македонија ќе се вратат правдата, слободата и демократијата“, рече Заев.
На оваа заедничка средба се реафирмираше Платформата за демократска Македонија, којашто беше дополнително потпишана од лидерот на Обединети за Македонија, Љубе Бошковски.
Бошковски, во името на Обединети за Македонија даде целосна поддршка на клучните чекори што мора да се исполнат. Уставниот суд да се произнесе за уставноста на СЈО, да прекине прогонот на демонстрантите и да се обезбеди целосно владеење на правото.
Заеднички беше заклучено дека фер и кредибилни избори се неопходни за земјава да се врати во нормален колосек и дека на фер избори ќе се случат демократски промени во Македонија.