Активистите на ДУИ вчера вечерта објавија дека го растураат кампот поставен на местото каде што општина Бутел планира да изгради крст,за да им овозможат на православните христијани денеска да ги посетат гробиштата на Задушница.
Потпретседателот на ДУИ и градоначалник на Чаир, Иџет Меџити изјави дека ќе продолжат да се бараат решенија преку демократски форми и оти бил постигнат институционален договор со посредство на меѓународната заедница за почитување на бадентеровиот принцип.
Дел од медиумите вчера пласираа информација дека наводно Владата на вонредна седница ја поништила општинската одлука за поставување крст, но изутрина оваа вест е демантирана од страна на македонската влада.
„Во целост ги демантираме дезинформациите кои се појавија во некои медиуми дека наводно Владата донела одлука со којашто се поништила одлуката на општина Бутел за изградба на крстот. Тоа е тотално неточно и невистинито. Владата нема донесено таква одлука, ниту пак вчера има одржано седница“, се вели во владиниот демант.