Легендарниот велшки фудбалер Рајан Гигс ќе го напушти Олд Трафорд по 29 години поминати во Манчестер Јунајтед, за кој одигра 963 натпревари, освои 35 трофеи, а последните две сезони беше помошник тренер.
Гигс се надеваше дека откако му асистираше на Дејвид Моес и на Луи Ван Гал ќе добие прилика самостојно да го води тимот. Првите луѓе на клубот, сепак го ангажираат Жозе Мурињо, кој на Олд Трафорд ќе донесе сопствен стручен штаб.
Велшкиот фудбалер доби понуда да биде врската меѓу првиот тим и клубската академија, но тој ја одби таа позиција. Гигс бил навреден и од тоа што Мурињо не се сретнал со него за да му ги објасни плановите, туку за се го информирал потпретседателот на клубот Ед Вудвард.
Дел од британските медиуми сметаат дека однесувањето на Јунајтед е срамно кон една од најголемите легенди во историјата на клубот. Гигс е рекордер со 963 настапи во црвениот дрес, со бројот на титулите англиски првак, а во клубот во кој дошол како 14 годишно момче остана до крајот на играчката кариера.