Новак Ѓоковиќ деновиве престојува во Соединетите Американски Држави каде го очекува настап на Мастерсот во Индијан Велс и по тој повод се занимава со бројни активности.
Српскиот тенисер посети студенти, следеше натпревари на ЛА Галакси, потоа НБА натпреварот помеѓу Лејкерс и Денвер, а се дружеше и со Линдзи Вон и една од најубавите актерки во светот - Шарлиз Терон.
Новак, Шарлиз и пејачот Гевин Росдејл се најдоа на тенискиот терен, а причината е годишниот настан на кој учествуваат светски ѕвезди со цел да се соберат средства за хуманитарни цели.
„Ајде, мрзливо копиле“, се пошегува Шарлиз додека Ѓоковиќ трча во обид да освои бод.
„Шарлиз ме намачи денеска, но претпоставувам дека тоа беше дел од тактиката. Беше чест да се биде дел од овој настан“, рече Ѓоковиќ, кому првиот човек на целата манифестација му се заблагодари што дојде.
За настанот проговори и познатата актерка.
„Јас сум од Јужна Африка, многу горда Јужноафриканка. И сакав да одржам врска со мојата земја која секогаш ќе ме враќа назад. Започнувањето на Charlize Theron African Outreach Project беше начин да се оддаде почит на сите грасрут организации кои вршат неверојатна работа во Јужна Африка. Веруваме дека сите млади луѓе треба да бидат здрави, безбедни и образовани“, рече Шарлиз.
Да потсетиме, мечот на Ѓоковиќ во минатогодишното полуфинале на УС Опен привлече голем број познати личности на трибините на стадионот, а меѓу нив беше и познатата актерка од Јужна Африка.
