Пратеникот од Демократскиот сојуз, Павле Трајанов, денеска поднесе предлог до Собранието за измени на законите за СЈО и за заштитени сведоци по редовна постапка.
Вчера пратениците не ги изгласаа промените предложени од пратеничката група предводена од СДСМ, коишто на пленарна седница стигнаа како измени на закони по скратена постапка.
Трајанов, вчера не можеше да гласа ни „за“, затоа што не беше присутен на седницата.
Со неговиот предлог, тие да се направат во редовна постапка, за нив прво ќе се расправа во комисиите, па потоа ќе одат на пленарна седница.
„Битно е за овие измени да има расправа во Собранието, а таквата можност се отвора ако измените се поднесени во редовна постапка. Има доволно време да се стават измените на дневен ред до распуштање на Собранието“, вели Трајанов.
Според деловникот, во рок од три дена претседателот на Собранието, треба да го достави предлогот до пратениците, а во рок од десет дена да закаже расправа.
Од Демократскиот сојуз, како што соопштија, очекуваат аргументирана расправа и преку носењето на законите и силна поддршка на СЈО.
„Парламентот наместо да ја попречува правдата, ќе создаде услови за поефикасна работа на СЈО и инволвираните во криминал да понесат одговорност“, соопшти ДС.
Собранието, поради закажаните предвремени парламентарни избори на 11 декември, треба да се распушти на 12 октомври.
