Македонските ракометари со пораз стартуваа на квалификацискиот турнир за пласман на Олимписките игри во Рио де Жанеиро. Македонија, во првото коло на турнирот во Гдањск, загуби од домаќинот Полска 20:25 (9:13).
Македонија загуби од Полска, но не ги загуби шансите за пласман во Рио, но она што загрижува по поразот од домаќинот на турнирот во Гдањск е играта во двата правци.
Полјаците го контролираа натпреварот од првата до последната минута, отворија со 3-1, Македонија потоа со два брзи гола на Манасков израмни на 3-3 и тоа беше единствениот момент кога „црвено жолтите“ имаа нерешено со противникот.
Полска во 13-та минута стигна до четири гола предност (9:5), која без поголеми проблеми ја сочува до крајот на првиот дел.
Победникот беше решен практично на стартот на вториот дел, кога Полска во 33-та минута поведе со 17:11.
Кире Лазаров со осум гоови беше најефикасен во македонската репрезентација, а Стоилов и Ѓеоргиевски погодија по четири пати.
Обрван и неговите избраници немаат многу време за анализа на овој пораз, бидејќи денеска ги очекува најважниот меч на турнирот против Тунис. Тие во првиот меч славеа над Чиле со 35:29.