Иако е сѐ уште рано за да шпекулираме за конечниот поредок во Источната конференција, плејоф поредокот почнува да добива појасна слика во последните две недели. Фаворитите почнаа да се одвојуваат од конкуренцијата, а борбата за самиот врв ќе биде жестока до самиот крај на регуларната сезона.
Синоќа тимот на Бостон Селтикс преку продолженија го совлада тимот на Торонто Репторс со конечен резултат од 123:116.
Феноменалната партија на Кајри Ирвинг му помогна на тимот на Бостон Селтикс да дојде до триумф во дербито на Источната конференција против Торонто Репторс. Тој синоќа постигна 43 поени и со забележа најголем број поени на еден натпревар од оваа сезона. Ако се земе предвид дека тој шутираше крајно ефикасно од поле (69%) и имаше 11 асистенции, тогаш мора да го сметаме Ирвинг за најодговорен за победата на Селтикс.
Покрај Ирвинг, уште неколку играчи од поставата на Селтикс синоќа одиграа одличен натпревар. Веќе станува вообичаено Џејсон Тејтум да биде еден од главните играчи на Селтикс, па така беше и синоќа, кога постигна 21 поен од само 13 шутеви кон противничкиот кош. Гордон Хејворт додаде 15 поени, додека Морис постигна 11 поени од клупата.
Во противничкиот состав на Репторс најдобар поединец беше Кавај Ленард, кој забележа 31 поен и 15 скока, но сепак не успеа му донесе победа на гостинскиот тим. Сите стартери на Репторс постигнаа двоцифрен број поени, а посебно импресивен беше Серж Ибака, кој вечерта ја заврши со 21 поен.
Останати резултати:
Индијана Пејсерс – Мајами Хит 99:91
Филаделфија Севентисиксерс – Јута Џез 113:107
Вашингтон Визардс – Бруклин Нетс 104:115
Мемфис Гризлис – Сакраменто Кингс 112:104
Минесота Тимбервулвс – Портланд Трејл Блејзерс 112:96
Њу Орлеанс Пеликанс – Њујорк Никс 129:124
Милвоки Бакс – Чикаго Булс 123:104