Овој филм за Џокерот се очекуваше со најголемо нетрпение.
И покрај насилната тематика на филмот, премиерата на „Joker“ предизвика голем интерес кај публиката и добива одлични критики, како и навестувања за Оскар.
Во првиот викенд од прикажувањето „Joker“ оствари нов рекорд за октомвриска премиера, со заработка од 93,5 милиони долари. Претходниот рекорд на посетеност го држеше „Venom“, со заработка од 80 милиони долари. На меѓународен план, „Joker“ заработи 140 милиони долари на 73 пазари, резултирајќи со фасцинантни 234 милиони долари на глобално ниво.
Филмот имаше премиера на Филмскиот фестивал во Венеција, каде ја доби престижната награда Златен лав.
Ликот на Џокерот, Артур Флек, во филмот за злогласениот негативец во режија на Тод Филипс го игра Жоакин Феникс. Неговата изведба е толку убедлива што некои гледачи не можат да ја „сварат“ и ги напуштаат киносалите.
„Само што излегов од проекција на ‘Joker’. Беше престрашно, со оглед на сѐ што се случува околу нас. Сметам дека филмот ги велича оружјето и душевните проблеми“, напиша еден гледач на социјалните мрежи.
„Сега излегов среде ‘Joker’. Одамна не сум се исплашил толку многу во кино, е*ате“, напиша друг.
Феникс и Филипс во интервјуа уште пред прикажувањето го бранеа филмот и нагласуваа дека веруваат дека публиката знае да ја направи разликата меѓу доброто и злото.
Армијата на САД и Полицијата на Лос Анџелес беа на готовс за време на кинопремиерата на „Joker“ во кината, а еден синџир киносали забрани носење костими на проекциите на филмот.
Мрачната тематика на филмот што се снимаше со буџет од 55 милиони долари, за подемот на лошиот кловн кој е заколнат непријател на Бетмен, ги разбуди сеќавањата за масовното пукање во кое загинаа 12, а беа повредени 70 луѓе, на полноќната проекција на „The Dark Knight Rises“ во Аурора, Колорадо во 2012 година.
Синџирот киносали Landmark Theatres што поседува 52 сали на 27 пазари, ја прошири забраната за маски и играчки-оружје и сега забрането е да се носат какви било костими додека „Joker“ игра во кината.
Дистрибутерот на филмот, студиото Warner Bros., излезе со соопштение во кое нагласи дека „насилството предизвикано од огнено оружје е критична тема“, како одговор на барањето на жртвите од пукањето во Аурора компанијата да го искористи своето влијание врз јавноста во насока на кревање на свеста за опасноста од огненото оружје.
„Joker“ игра на редовен репертоар во Синеплекс и Кино Милениум.