Ултраспотскиот автомбил на Pagani, моделот Huayra Roadster премиерно ќе биде прикажан на автомобилскиот саем во Женева, а ќе биде полесен и посилен од истоимената Coupe верзија.
Од италијанската автомобилска компанија објаснуваат дека Huayra Roadster е најкомплексниот проект на кој работеле до сега, а официјалните фотографии покажуваат атрактивен автомобил кој има многу сличности со купе верзијата, вклучувајќи го и препознатливиот издувен систем.
Кабриолетот доби нови тркала, нов поклопец за моторот, а внатрешноста е обложена со беж боја. Купувачите ќе можат да изберат меѓу карбонски стаклен или класичен платнен покрив.
Централно поставениот V12 битурбо мотор што Pagani го изработува со AMG ќе развива 774 коњски сили и ќе нуди 1.000 Nm максимален вртежен момент. Преносот на силата на подлогата се одвива преку 7-степениот менувач, а Pagani наскоро ќе претстави и уште посилна верзија која ќе располага со 800 коњски сили.
Инаку Roadster верзијата е за 80 килограми полесна од Coupe изведбата, автомобилот е изработен од комбинација на карбон и титаниум.
Pagani ќе ја понуди Huayra Roadster во само 100 примероци по цена од 2,28 милиони евра, а сите автомобили се веќе резервирани.
