Шпанскиот фудбалски гигант Барселона официјално прогласи пет играчи за клупски легенди.
Хулиано Белети, Педро Родригес, Давид Виља, Иван Ракитиќ и Нејмар од денеска можат да се најдат во рубриката „легенди“ на официјалниот сајт на клубот.
Од петте, најдолг стаж во Барселона има Педро, кој го носеше дресот на каталонскиот гигант од 2008 до 2015 година.
Ракитиќ беше член на Барса седум години (2014-2021), Нејмар четири (2013-2017), а најкратки беа Белети (2004-2007) и Виља (2010-2013).
Сите тие барем еднаш со Барса го освоија шпанското првенство и Лигата на шампионите.
Барселона сега има вкупно 108 легенди во својата 124-годишна историја, а наведените пет играчи им се придружија на великаните како Лионел Меси, Чави, Андрес Иниеста, Диего Марадона, Јохан Кројф, Роналдињо, Ривалдо, Карлес Пујол, Пеп Гвардиола, Роналд Куман...