Откако претходно претседателот Ѓорге Иванов ја повлече одлуката за аболицијата за сите 56 лица, движењето „Шарена револуција“вчера вечерта побара оставка на актуелната влада на ВМРО-ДПМНЕ и ДУИ и формирање на преодна влада, а најавија и радикализација на нивните протести со непопуларните блокади на раскрсниците во центарот на Скопје.
Притоа ова движење ги испорача своите барања за кои на власта ѝ даде рок до 18 јуни и од утре најави блокади на клучните раскрсници во Скопје.
Во прогласот објавен на официјалната Facebook страница на Шарената револуција на Владата ѝ се порачува „да ги сфати многу сериозно“ и „итно да ги исполни“ нејзините ултиматуми „за оваа криза да не се продлабочи уште повеќе“.
Според нивниот план сега треба многу брзо да бидат исполнети два од нивните услови, а тоа се Уставниот суд да се произнесе за уставноста на Специјалното јавно обвинителство и да запре прогонот врз демонстрантите.
Покрај овие барања за кои демонстрантите го испорачуваат рокот до 18 јуни, тие бараат и оставка на актуелната влада на ВМРО-ДПМНЕ и ДУИ и формирање преодна влада, потоа формирање специјално одделение во Кривичниот суд за предметите на СЈО , вклучување на граѓанските организации во преговорите, оставка на Ѓорге Иванов од функцијата Претседател на Република Македонија
Тие најавија радикализација на протестите со блокади на раскрсниците во Скопје од среда 8 јуни затоа што велат дека така ќе покажат како всушност изгледа животот во блокирана држава со блокиран пристап до правда, блокирани и партизирани институции.
„Блокада на системот е нужна за да ги спречиме и понатаму да ја блокираат правдата! Бараме разбирање и поддршка од сите наши сограѓани, бидејќи ова го правиме за подобра иднина за сите нас“, се вели во прогласот на Шарената револуција.
Протестот започна вообичаено во 18 часот пред СЈО, а демонстрантите ги пречека силен полициски кордон. Денешниот протест се одвиваше под мотото „Овде е крајот. Заради Мартин, за сите!“. На денешен ден пред пет години, Мартин Нешковски беше претепан од специјалецот Игор Спасов на прославата на изборната победата на ВМРО-ДПМНЕ.
На вчерашните протести демонстрантите по кусо кошкање го пробија полицискиот кордон од полицајци кај Соборниот храм, и успеаја да се пробијат кон зградата на Владата. На чело на вечерашниот протест беа и лидерите на опозициските партии.