Филмот „Synonyms“ на израелскиот режисер Надав Лапид ја доби Златната мечка за најдобар филм на 69. меѓународен филмски фестивал во Берлин.
Со Сребрена мечка во категоријата за најдобра режија е наградена германската глумица и режисерка Ангела Шанелец за филмот „I was at home, but“.
Жирито на чело со актерката Жулиет Бинош ја додели Сребрената мечка за најдобар актер на кинескит актер Ванг Јунгчун за улогата во филмот „So long, my son“, а во категоријата најдобра актерка Сребрената мечка ѝ припадна на кинеската актерка Јонг Меи за улогата во истиот филм.
Наградата Гран при од жирито му е доделена на филмот „By the Grace of God“ на францускиот режисер Франсоа Озон.
Свеченоста за доделување на наградите беше по малку пригушена во нејзиниот сјај – вечерта почна со едноминутно молчење во знак на сеќавање на актерската легенда Бруно Ганц, кој почина завчера, а потоа следеше збогувањето со уметничкиот директор Дитер Кослик кој заминува од позицијата после 18 години.
Претходно во текот на денот беше соопштено дека македонскиот филм „Господ постои, името ѝ е Петрунија“ на Теона Стругар Митевска доби награда од независното жири „Ecumenical” и награда „Guild Film Prize” во рамки на Берлинскиот филмски фестивал.
– Презадоволни сме од досега постигнатиот успех со овие две престижни награди, а задоволството е уште поголемо кога ја гледаме публиката како реагира на приказната за Петрунија во текот на овие фестивалски денови. Независно од исходот на главното доделување на „Златната мечка“, овие две награди, како и овациите, аплаузите и одличните рецензии од врвните филмски критичари, за нас се најголемото признание и сведоштво дека навистина успеавме да направиме филм кој испраќа силна порака, изјави режисерката Стругар-Митевска.
„Ecumenical Award“ е независна филмска награда која од 1973 година им се доделува на филмови на големи меѓународни филмски фестивали , како Кан, Берлин, Локарно, Монтреал и Карлови Вари. Целта на наградата е да се оддаде почит на уметничките дела што сведочат за моќта на филмот во откривањето на мистериозните длабочини на човекот. Наградата „Guild Film Prize”, пак, ја доделува тричлена жири-комисија, чии членови се управители на арт-кина.
