Последната сцена што Лук Пери ја сними за актуелната сезона на ТВ-серијата „Riverdale“ ненамерно е прекрасно збогување на популарниот актер.
Пери го играше ликот на Фред Ендруз од пилот епизодата, до неговата смрт на 4 март. Ликот уште не е „отпишан“ од серијата, но според извршниот продуцент Роберто Агире Сакаса епизодата што се емитуваше синоќа е последната што Пери ја снимил, а неговата последна сцена била „прекрасен, вистински момент меѓу татко и син“.
Пери, кој се прослави во 90-тите со улогата на Дилан Мекеј во серијата „Beverly Hills 90210“, почина на 52-годишна возраст по тежок мозочен удар.
„Длабоко сме растажени од веста дека почина Лук Пери. Тој беше сакан член на семејството Riverdal, неверојатно внимателен, посветен, професионалец, човек со големо срце и вистински пријател. Беше татковска фигура и ментор за младите во актерската екипа. Великодушен човек кој внесуваше љубов и добрина во екипата. Нашите мисли се со семејството на Лук во овие тешки моменти“, напишаа продуцентите на серијата кога беше објавена веста за смртта на Пери.