Годинава што изминува имаше богата понуда на нови ТВ-серии. Netflix и HBO значително „растураат“ со понуда, а во 2018 година понудија нови серии што со нетрпение ги гледаме или чекаме да ги гледаме.
Со поприлично густиот распоред на премиери и трејлери што ветуваат напната приказна и забавни, но длабоки дијалози, беше тешко да се направи избор за да се следат сите серии со достојно внимание.
Сепак, го направивме овој потесен избор во кој веруваме ќе се најде по нешто за секого. Погледнете ги трејлерите и одберете кои од овие серии ќе ви бидат омилената занимација и тема на разговор во 2019 година.
Killing Eve
Визуелно совршена мод(ер)на приказна за две навидум сосема различни жени – Ив, неконвенционална и интелигентна агентка на МИ5 која не влегува во радарот на нејзините шефови и се убедува дека животот не ѝ е здодевен, сѐ додека не се појави ладнокрвната и шармантна Виланел, платен убиец која е фасцинирана со Ив. Опсесијата меѓу двете жени станува взаемна во овој возбудлив акционен шпионски трилер што е сѐ само не предвидлив.
Homecoming
Американски психолошки трилер со Џулија Робертс во главната улога на Хајди Бергман, поранешна социјална работничка во Homecoming Transitional Support Center, установа што им помага на војниците да се вклопат во сеојдневниот живот како цивили откако биле на мисија. Таа се дистанцира од стариот живот и работата, но тоа не значи дека нема да се вратат да ја прогонуваат.
Maniac
Приказните на Ени Ландсберг (Ема Стоун) и Овен Милгрим (Џона Хил) се преплетуваат откако ќе станат дел од мистериозен фармацевтски експеримент. Типично – нештата не се одвиваат според планот.
Forever
Џун и Оскар живеат удобен, но прилично предвидлив брачен живот, кога одеднаш ќе се најдат во сосема неочекувана ситуација што ќе ги натера да размислуваат поинаку за љубовта и бракот. Forever е оригинална, прониклива и потресна комедија за љубовта, псветеноста, бракот и разбирањето што ќе ве натера и вие да си поставите многу прашања за кои сте се плашеле да ги дознаете одговорите.
Uspjeh
Тројца странци ги врзува несреќен сплет на околности, кога ќе се обидат да помогнат на жртва на насилство. Како последица на нивните дела ќе почнат да се вовлекуваат во секој аспект од нивните животи и овие сосема обични луѓе со сосема различно потекло и животни приказни решаваат да ја вратат контролата врз сопствените животи.