Рускиот тенисер Даниил Сергејевич Медведев денеска изјави дека е подготвен да игра под неутрално знаме на Олимписките игри во Париз, пренесува американската мрежа ESPN.
Вчера Меѓународната тениска федерација (ИТФ) им дозволи на играчите од Русија и Белорусија да учествуваат на Олимписките игри во Париз во неутрален статус. Медведев истакна дека со нетрпение ги очекува Олимписките игри во Париз, бидејќи пред три години стигна до четвртфиналето на Игрите во Токио.
„Ако можам, ќе бидам во Париз. Ќе играм и сингл и двојки. Имам неверојатно искуство од Игрите во Токио. Тоа е веројатно најдобриот спомен во мојата кариера. Ме изненади, бидејќи за тенисерите Гранд Слем турнирите се многу поважни. Што се однесува до играњето под неутрално знаме, ќе ги почитувам правилата. Ако треба да играм под неутрално знаме, ќе играм. Ќе се обидам да победам, тоа е сигурно“, рече Медведев на прес-конференција во Индијан Велс.
ИТФ вчера соопшти дека изборот за ОИ во Париз ќе се одвива според рејтингот кој ќе биде објавен во јуни по завршувањето на Ролан Гарос. Секоја земја може да има најмногу 4 играчи во сингл. Тенисерите од Русија и Белорусија мора да бидат избрани под општи услови и да ги исполнуваат „условите на неутралност“.